Twee gedecoreerde in ’t besjtuur van Veldeke Krink Remunj
Op vriedig 26 april 2024 waerde Henk Giesbers en Wim Kemp blie verras mit 'n lintje!
Inins sjting óm 10:30 oer in heugseigepersoon Yolanda Hoogtanders, börgemeister van Remunj, oppe sjtoep bie oze aad-veurzitter Henk Giesbers mit ’n lintje oppe tes. Henk waas totaal verpoepzak, want hae meinde oprech det de börgemeister veur de buurman kwoom. Bie de ouch binneloupende gaste waas Wim Kemp, dae metein nao de ceremonie dringend nao hoes weggerope waerde. Wis Wim väöl det de börgemeister ouch veur hem ’n lintje in petto haaj!
Al 25 jaor is Henk besjtuurslid van de Veldeke Krink Remunj, wo-van meer dan 20 jaor veurzitter. Hae haet in dae tied binne de Krink ontzèttend väöl op touw gezat en jaorelank doorgetrokke, wie ’t Halfvastesjpektakel, de Declamatiewedsjtried, de Literaire Wanjeling – óm mer inkele te neume. Ziene jaorlikse sjpreukekelender, is al jaore 'ne grote hit in Remunj. Al meer dan 2.500 sjpreuke verzamelde Henk veur in totaal 7 edties. Veur Vastelaovesvereiniging ‘De Katers’ oet Neel haet hae jaorelank de Bóntje Aovendje geregisseerd, leedjes bedach en óntelbare tekste gesjreve dan waal geredigeerd. Heel döks haet hae oetgave in ’t plat sjtevig geholpe óm ’t laevesleech te zeen, wie onlangs ’t book van de Limburgse Vastelaovesmonumente. Mit zien creativiteit en tact haet Henk heel väöl miense geïnspireerd en gemotiveerd. Daomit haet hae ‘ne impuls gegaeve aan ’t plat en de volkscultuur dae nog lang merkbaar zal zeen.
Wim Kemp is eigelik noojt toes, behalve óm te vergadere – zo liek ‘t waal. Ouch hae is al 25 jaor besjtuurslid van oze Krink Remunj, wo hae zien sjteinke royaal biedreug aan talrieke activiteite en literaire oetgave in ’t plat. Ouch sjrief Wim veur ziene zangroep ‘Op Good Gelök’ al heel get jaore pakkende vastelaovessjlagers. Daonaeve is d’r sinds 2006 veurzitter van de sjtichting Vrienden van het Indië-Monument en ouch adviseur van de sjtichting Nationaal Indië-Monument 1945 – 1962. Hae waas lid van de Maatschappelijke Klankbordgroep Nederland van ’t Landelijk Indië-óngerzeuk en daonaeve is d’r ónger angere nog sjteeds drök mit de organisatie van de Vriendendagen veur Oud-Indië en Nieuw-Guinea Veterane in Arnhem. Al sins 1976 is Wim vriewilliger bie Voetbalvereiniging SVC 2000, - begós es jeugleider, later es sjeidsrechter scoördinator en lid van de sanctiecommissie en noe es besjtuurslid. Veur Sjötterie Sint Urbanus Neel is hae besjermheer, vertroewespersoon en veurzitter van ’t Ere-comité. Wim is sikkertaris gewaes van ’t OLS 2014 en ouch van de pastorale eenheid Kapel in ’t Zand. Wim is ‘ne verbinjer wo-in miense zich herkinne. Doodgeweun ‘ne hele bezunjere miens..
De Veldeke Krink Remunj is ontzèttend greuts dees twee miense die van grote beteikenis zeen veur de samehang en identiteit in Remunj en de wieje ómsjtreke in häör midde te moge höbbe. Veer haope nog heel lang van häöre inbring te moge genete!
« Trök.jpeg)
