Actueel

Actueel > Nuuts

Muzikale ode aan de (Maas)Neelder Baek

Geplaatst op 21 januari 2021

Eigelik ligk de Neelder Baek geweun flink in de waeg. Toch besjlaot ‘Blindj Mit’, besjtaonde oet Jos Even, Marcel Waajen en Luc Janssens, d’r e nummer euver te sjrieve. Zónger die baek waas Neel d’r noojt gewaes.

Aafgeloupe veurjaor waas de ganse Wilheminalaan in Neel aopegebraoke. D’r waerde flink gewirk aan de betónne euverkluzing van de Neelder Baek. ’N baek die óntsjpringk aan de randj van ’t hoogterras van Moder Maas op ’t Maolbrook. Óm de Dónderberg haer zeuk de baek zich ’ne waeg nao de Maas. Dwaars door Neel. Op de Eiermert in Neel geit de baek ónger de gróndj, óm pas op de Schilberg in Leeve weer baove de gróndj te kómme.

Neel dank zien besjtaonsrech aan dees baek. Neel is ‘ne gans aje naam veur daal, e baekdaal dus. Vreuger loge d’r naeve det water inkele grote sjteinfebrieke, die veur de neudige werkgelaegeheid zorgde.

Noe zorg die baek allein nog maar veur de aafwatering, óm te vèsse in de viever en langs de vievers te wanjele.

                 

Väöl miense in Neel weite gaaroet neet det d’r ’n baek óngergónds door Neel löp. Pas wie de Wilhelminalaan mit väöl gedaver waerde aopegebraoke kwame ze dao achter. Euver väöl sjtruimkes en riviere zeen leedjes gesjreve. Euver de Neelder baek gaaroet nieks. Daoróm klóm Jos Even in de pen en sjreef de tèks nao ’t orzjeneel Stadtrandfluss van de Duitse band Querbeat. ’t Arrangement is van Joep Schrader en de opname is gemaak door Hub Boesten.

't Nummer Neelderbaek vèlt mit de bieheurende videoclip te zeen en te beloestere op Facebook en YouTube. Klik <hie>

« Trök
Muzikale ode aan de (Maas)Neelder Baek