Veldeke Pluum 2021 veur Léon Hamans
Op vriedig 17 december j.l. kreeg Léon Hamans oet henj van Henk Giesbers de Veldeke Pluum 2021
Op vriedig 17 december j.l. haet Léon Hamans oet henj van Henk Giesbers, veurzitter van de Veldeke-Krink Remunj, de Veldeke Pluum 2021 gekrege.
Léon waas e dieke 33 jaor veurzitter van VV de Katers oet Neel en hae sjtóng aan de weeg van ’t liefblaad van de Katers: KlassjeNeel. Hae sjreef neet allein väöl sjtökskes, maar dreug al bienao 30 jaor langk de verantjwaordelikheid veur ’t ganse logisjtieke gebeure. En det allemaol in oos dialect. Ouch maakde hae väöl Katerleje enthousias óm deil te naeme aan aan de cursus laeze en sjrieve.
Nao zien loupbaan as tandjars begós Léon met e gans nuuj projek det van historiese waerde zal zeen veur de ganse provincie Limburg. Hae geit same mit Hans Simons oet Zjwame e book oetgaeve, wo-in alle vastelaovesbeelde die in de aope lóch sjtaon geprizzenteerd waere. Det waert e ‘collectors-item’ mit meer dan 180 kunszinnige vastelaovesbeelde. Naeve oetlègk in het ABN, sjteit d’r ouch ’ne oetlègk in ’t dialect van de plaats wo ’t beeld sjteit. ’t Is geweun subliem óm op dees meneer de versjille in oos Limburgs dialect veur oos naogesjlach vas te ligke. Allein al óm die raeje waert ’t e verzamelwerk veur al die miense die oos dialect e werm hert toedrage. ’t Projek zal in de tweede helf van 2022 geprizzenteerd waere. De Veldeke-Krink Remunj is bezónjer greuts op Léon en vintj zie werk van grote beteikenis veur de Limburgse taal en cultuur.
« Trök
