Veldeke Pluum 2023 veur veurzitter Henk Giesbers

Nao 20 jao veurzittersjap en 5 jaor vice-veurzitter vónj hae 't tied óm aaf te traeje

Veldeke Pluum veur Henk Giesbers
Jaorelang haet hae dees appaarte óngersjeijing moge oetreike aan heel get luuj in ’t wèrkgebied van de Krink Remunj die zich bezunjer verdeenstelik höbbe gemaak veur ’t dialek of de volkscultuur. Tiedes de jaorvergadering op 25 mei woor ‘t aan veurzitter Henk Giesbers de beurt óm zelf zo’n Pluum te kriege. Nao twintjig jaor de Remunjse Veldeke-ker getrokke te höbbe, vónj Henk ’t tied óm aaf te traeje. Hae haaj det sjtilkes wille doon, mer haaj boete zien mitbesjtuurders geraekend. Die memoreerde waat hae boete de vergaderinge plezerig leije zo allemaol gedaon haet: ’t Halfvastesjpektakel organizere, nuuj beuk prizzentere, zeve edities van de Remunjse sjeurkelender verzorge en eerste eksemplare oetreike, toesjpraoke en inleidinge haje, reklaam op sjtreekradio en tv make veur Veldekeaktiviteite, de nuutsbreve veur de leje samesjtèlle, kontakte óngerhaje mit sjole, bedrieve, euverhede en bookhanjels. En luuj bedanke op zien eige veurtreffelike meneer.
Behalve de Pluum kreeg Henk es dank veur al zien vriewilligerswerk veur Veldeke ouch nog e sjoon sjilderie van oze hoeskunsteneer Gerard Nizet mit versjillende veur hem bekinde thema’s d’rop. En vice-veurzitter Jos Even sjtèlde de vergadering veur óm Henk toet ereveurzitter te beneume, womit me unaniem akkaord ging.
“Mit ein dink is ‘t besjtuur opgeluch en bliej:
hae blief veurluipig es geweun besjtuurslid d’rbie.