Actueel

Actueel > Nuuts

Veldeke Pluum 2020 veur Hans Simons.

Geplaatst op 23 december 2020

Op dinsdig 22 december haet Hans Simons oet henj van Henk Giesbers, de veurzitter van de Veldeke-Krink Remunj, de Veldeke Pluum 2020 gekrege.

Nao zien loupbaan as basissjooldirrektäör is hae geweun wiejer gegaon. Hans is veur väöl vereiniginge in oos ómgaeving, maar besjlis ouch in Zjwame ’n echte sjteun. Hae maak logo’s, hae sjtik fotocollages inein, hae verzorg de opmaak van brochures en de opmaak van beukskes.

Óm inkele dinger te neume: ’t Zjwaams Waordebook, allerlei brochures veur zien aaj-basissjool, versjillende lesbreve van Veldeke veur basissjole, Nuutsbreve veur Veldeke, ’t Psalmebeukske van pater Sjmeets en ’t beukske‘Mien eerste wäördjes’. ’t Allerlèste product, wo Hans de opmaak van veur zien raekening noom waas ’t Verhaolebeukske veur kienjer in het dialect. De eerste drök waas in drie oer tied gans oetverkóch.

Ouch maakde hae same mit zien vruike Riky de gedichtebundel ‘Óm ós haer’. En óm zich haer kieke det kint Hans as geine angere. Det zuus se aan zien foto’s. In zien foto’s zuus se wie Hans de waereld óm zich haer bekiek. Det kint hae wie geine angere. ’Ne fotograaf, ’ne opmaker van beuk sjteit meistal neet zo in de kieker. Toch kint me neet zónger zo emes. Hans duit zo väöl hae kint en daoveur is Veldeke ’m bezunjer dankbaar. Veer haope nog jaore op ’m te kinne boewe.

« Trök
Veldeke Pluum 2020 veur Hans Simons.