Veldeke’s Limburgse Leedjeskelender 2026
Veldeke Pluum 2026 en Ere-penning veur Carmen Linnartz
Als sins 2004 eert Veldeke Remunj mit de Veldeke Pluum miense die zich bezunjer verdeenstelik höbbe gemaak veur veur oos dialect en ozze volkscultuur. Dit jaor haet Veldeke emes op ’t oug waat zich via de volkscultuur sjterk inzet veur oos taal.
En det is ‘m mit de paplaepel ingegaeve. Via pap en man al veertig jaor betròkke bie de Vastelaovend in ‘n wiek van Remunj wo det neet veur ederein vanzelfsjpraekend is. Al bienao 25 jaor is ‘t de drievende krach achter de Bóntje Aovend Sjtichting van de Donderberg, Es arties, presentator, regisseur, organisator, mer veural ouch es sjriever van tekste van haos alle leedjes en ekts van de Bóntje Aovend van de Donderböl en van de Bontje Aovend häör jeug. Al net zo lang göf ’t leiding aan mesjiens waal de sjoonste dansgarde van Remunj – de Dóndersjtraole en de kleintjes - de Dondersjträölkes. Ouch maak ’t al meer dan zesteen jaor programma’s veur de versjillende lokale omrope van Remunj. Bezunjere aandach göf ‘t daobie aan alles waat mit de lokale taal en volkscultuur te make haet.
Netuurlik höbbe veer ’t dan euver Carmen Linnartz.
Carmen maak al ’n kwart eeuw veur jónk en aad van de belaeving van ós dialek en ozze kultuur ein groot fees. Al ’n kwart eeuw lank dreug ‘t det actief euver op volgende generaties, net wie zien vader Karel en moder Joke det jaorelank höbbe gedaon. Carmen trots op dien taal en cultuur sjtraolt aaf op alles waat ‘t duit. ’t Is pleitbezörger in waord en daod veur de Limburgse zaak. Mede dankzij Carmen haet ozze taal toekóms. Veldeke is Carmen daoveur heel, heel dankbaar.
In 2010 óntving zien moder Joke de Pluum van Veldeke Remunj. Op 25 april 2026, tiedes de viering van 100 jaor Veldeke Limburg, veel Carmen Linnartz de Pluum van Veldeke Remunj en ouch de Ere-Penning van Veldeke Limburg toe, oetgereik oet henj van Jos Even (Veldeke Remunj) en Thijs Peters (Veldeke Limburg). Carmen van herte proficiat mit dees ere-teikens! Veldeke haop nog heel, heel lang van Carmen en zien toewijding te moge genete.
'n Video-versjlaag vinjt geer <hie>
« Trök