Gelöksexpres zóndig 8 juni 2025
Veldeke Pluum 2025 veur Luuk Hendriks
De Veldeke Pluum geit dit jaor nao Luuk Hendriks. Det gebeurde op zóndaag 13 april in Bibliorura. Luuk is emes dae veur de Limburgse taal- en volkskultuur van grote beteikenis is. Op zien eige meneer levert hae ’n belangrieke biedraag aan ’t Remunjse gemeinsjapslaeve.
Hae is óndanks zien jónge laeftied al jaore sjriever, naokieker en lid van de hoofredaksie bie ’t Zjwetskammezaol en hoofriddaktäör van de Uulewapper. Alle twee de beukskes zeen oetgaves van VV D’n Uul. Ouch is hae al sins 2020 betrókke bie de Sjnapsnaze, de kinjer van VV D'n Uul. Veur 't naokieke van 'ne tekst kins se altied bie Luuk terech. Daonaeve is t'r ouch vriewilliger bie Roermond In Tune, 'n platform wo muzikante, podia en publiek zich kint vinje.
Veur 't Zjwetskammezaol ging Luuk beveurbeeld veur ‘n interview nao oze nuje bussjop. Ein van zien vraoge waas, of veer ’m nog örges mit de vastelaovend zólle zeen. Mgr. Ron van den Hout haaj dao nog neet euver naogedach, maar hae zag det hae in eder geval nao de optoch zól kieke. Dae trok toch door de Paredisstraat!
Verder maakde Luuk veur de Uulewapper e nuuj Remunjs Laesplenkske. Hie-op sjtónge de wäörd: pötje sjerre, kelderverke, pómpesjtein, sjloetsjpang, klitsreem, taot, aomezeik, sjmiespele, kallebas, pensórgel, op de huukskes, foepnaas, zjwaegel, sjtaekbaere, bäöke, muuskebelle, kloeke en doorsjlaag. Dees wäörd waerde sjoon aangekleijd mit gooj foto’s. En det alles in good Remunjs gesjreve. Luuk is geweun emes dae veur Remunj góldj waerd is. Hae wilt de klein óngerdeile oet oze kultuur neet verlaore laote gaon. Luuk is nog erg jónk, 22 jaor, maar sjrief Remunjs wie eine aje. Veer kinne nog väöl van 'm verwachte. Op zo emes zeen veer greuts en Luuk Hendriks krieg daoróm de 21e Veldeke Pluum. Laura Theunissen haaj ’n sjoon gedich euver en veur ‘m gemaak. De Prinsekepel van D’n Uul, wo Luuk ouch lid van is, brach ‘m totaal ónverwachs e sirrenaatje. De aanwezige kóste nao aafloup nog de tentoonsjtèlling euver de Remunjse taal bekieke, die nog altied in de bibliotheek te zeen is.
« Trök