Roel Hendriks guf de nuje kurzes‘Remunjs laeze en sjrieve’

Heel väöl Remunjenere höbbe inkele jaore geleje de kurzes ‘Remunjs laeze en sjrieve’ gevolg, gegaeve door dr. Pierre Bakkes, thans oze ere-veurzitter. Mer Pierre ging 'n tiedje trök mit waalverdeend pensioen.

Mit alle nuje aandach veur 't sjpraeke en sjrieve in 't plat, kriege veer sjteeds meer vraoge óm weer 'ne kurzes op te sjtarte. Veldeke Remunj is noe óntzettend greuts det veer in de persoon van Roel Hendriks 'ne kakelnuje en ouch gerenommeerde kurzesleider höbbe gevónje veur 'ne nuje reeks van kurzesse. Roel is ónger meer via zien jaorelange inzat veur 't Zjwetskammezaol en de Uulewapper van D'n Uul zeer bedreve in 't Remunjs. Roel haet oet 't matterjaal van Pierre 'ne nuje, kortere kurzes van twee aovendlesse samegesjtèld.

Bös dich 't plat al mechtig en wils dich meer praktische kènnis euver de sjpellingsregels veur de Limburgse dialecte? Wils dich neet allein ‘plat kalle’ mer ouch get mekkeliker Remunjs kinne laeze en sjrieve? Melj dich dan aan veur de kurzes van twee aovende via info@veldekeremunj.nl. Deilname kòs €35. D'r zeen nog inkele plaatse veur de kurzes van aankómmende dónderdaag 20 en woonsdaag 26 november. De kurzes waert gegaeve in 't zaelke van Blóndj en Blóndj aan de Roerkade 6 in Remunj. In 2026 volg dan 'ne nuje reeks.

Veur miense die 't plat nog neet mechtig zeen mer gaer zólle wille lere, beje veer de kurzes 'Limburgs es tweede taal' aan. Meer info kint geer kriege via 't eerdergeneumde e-mailadres.