Remunjs laeze en sjrieve? Det kins se lere!

Geplaatst op 19 juni 2026

't Remunjs laef en 't is nog sjoner es se 't neet allein sjpriks, mer ouch good kins laeze en sjrieve.

Väöl miense sjpraeke häör dialek, mer zo flot es 't op sjrieve aankump, waert ’t dök ’n sjtök lestiger. Wils se gaer weite wie se 't Remunjs op de gooj manier op pepier zits? Dan is de cursus ‘Remunjs laeze en sjrieve’ get veur dich.

Veldeke Remunj organiseert deze cursus ónger leijing van Roel Hendriks. Tiedens twee gezellige aovende leers se de basis van 't laeze en sjrieve in 't Remunjs. De cursus is gesjik veur beginners, mer ouch veur miense die häöre kinnes weer ins wille opfrisse.

Veur de eersvolgende sessie op dónderdaag 2 en 9 juli van 19.30 tot 21.30 oer is d'r nog plaats in café Aad Remunj in Remunj. Deilnaeme kos € 35,- per persoon.

Dialek is 'n belangriek óngerdeil van ós kultureel erfgood. Door te lere wie se Remunjs sjriefs, dreugs se bie aan 't behaje van de taal van ós sjtad. Daobie is 't 'n leuke en leerzame aktiviteit wobie se op 'n anger meneer nao dien eige dialek leers kieke.

Belangstèlling? Meld dich dan aan via info@veldeke.nl. Bie genóg belangstèlling waert nao de zómer opnuuj 'ne cursus gegaeve. Wacht neet en griep dien kans

« Trök