Gelöksexpres zóndig 9 juni
Luus Janssen oet Herte Limburgs Declamatie kampioen!
Lek vinger, lek doem, zag de jury euver Luus ziene veurdracht van 't gedich Flaai!
Zaoterdaag 25 mei woor in De Hanenhof in Gelaen de finale van de declamatiewedsjtried van Veldeke Limburg. Vanoet Remunj hadde veer dao drie kienjer haer aafgevaardig: Bob, Luus en Zahra. De zaal zoot good vól mit supporters. En waat ’n kanjers traoje dao op! Waat opveel woor det bès väöl kienjer ’n zelf-(mit eljer of grooteljer) gemaak gedich veurdroge. En det d’r weer meer kienjer van groep 3,4 en zelfs van 1 en 2 mitdeje. Det guf haop veur de toekoms van ós plat.
Luus Janssen van bs De Stapsteen oet Herten haaj ’n mit verve gebrachte veurdrach euver flaaj en wis mit zien zeve jaor zelfs Limburgs kampioen te waere in de categorie groep 1,2,3,4. Mit zien sjtökke flaaj haet ‘t de juryleje ech neet ómgekoch, want die hadde häör puntje al gegaeve. Ouch Bob en Zahra zatte häör bèste beinke veur mit häör versje euver ‘ne sjprinkhaan en blome, mer de concurrentie van die anger 28 kienjer woor natuurlik groot.
Dit is 't winnend gedich van Luus:
Flaai!
Heerlìk, ich vinj ze zo lekker:
al die saorte flaaj in de vitrien biej de bekker.
Ich kin haos neet keze: greumele, keerse, sjtaekbaere, rieste, abrikoos,
doot mich mer zo’n lekker flaaj in dees doos!
Saoves druim ich d’rvan
det ich, es ich get groter bön, zelf nao de bèkker kan!
Mer dan is ‘t wiek-end, veer gaon biej opa en oma op bezeuk
en det vinje veer altied heel lekker… Euhhh… LEUK!
Boete det veer häör heel gaer zeen,
vinje veer ouch nog get angers biej häör heel sjoon.
Oma haet namelik duks bakplanne óm same mit ós te doon.
En dan moge veer helpe,
‘t Fruit sjnieje, deig dreije en de kloppers aaflekke:
neet veur nieks det veer gaer biej opa en oma blieve plekke.
En dan is ‘t zo wied, de kaokwèkker geit aaf,
de koffie pruttelt fijn door ‘t apparaat…
Veer wete waat det beteikent en sjtaon al paraat…
Tied veur ‘n lekker sjtökske zelfgebakke flaaj,
det is wo ich es Limburgs maedje van haaj..!
(Luus Janssen en mama Imke Houben)
