Alweer 'ne gesjlaagde kurzes Remunjs laeze en sjrieve!

Op 2 en 9 juli waas alweer de derde editie van de door Roel Hendriiks nuuj opgezatte kurzes 'Remunjs laeze en sjrieve'.

Deze keer waerde veer weer gasvrie óntvange bie Kefee Aad Remunj. Elf deilnaemers höbbe zich verdeep in 'n bietje achtergróndj, mer veural in de sjpellingsregels. En ze höbbe heel väöl praktisch geoefend. Zelfs 't hoeswerk hadde ze allemaol op tied vaerdig!

Op de oproop van inkele waeke geleje zeen zoväöl reaksies gekómme, det de cursus later dit jaor nog twee keer zal waere gegaeve. 

Limburgs kalle is beheurlik aktueel. Kiek mer nao de in juni gesjtarte campagne "Praot Limburgs mit mich" van de Provincie Limburg: gebroek 't 'L-gebaar' óm aan te gaeve des se plat kals.

Veldeke Remunj dreug der aan bie óm plat kalle 'n vanzelfsjpraekendheid te laote zeen zodet veer ós versjtaon.

Wilt geer ouch mitdoon? Gaef uch op via: info@veldekeremunj.nl. Deilname kòs €35. 

Veur miense die 't plat gaer baeter wille versjtaon en begriepe, en ouch get wille kalle, beje veer de kurzes 'Leef Limburgs, Limburgs es tweede taal' aan. Meer info kint geer kriege via detzelfde e-mailadres.