“Ouch det nog! What now?” geprizzenteerd door Veldeke Remunj

Geplaatst op 3 mei 2025

Det is de titel van ’t tweetalige (Ingels / Remunjs) beukske det op 2 mei 2025 is geprizzenteerd door Veldeke Remunj tiedes ’t aafsjeid van Cathy OKelly es archiefmitwèrkster bie de gemeinte Remunj.

De van oorsjpróng Ierse Cathy sjreef ’t verhaol in ’t Ingels en gaof ’t aan Veldeke Remunj óm ’t te vertale in ós plat. Ouch teikende ’t de grappige plaetjes van meneer Dinges zelf.

Sjtèl dich ‘ns veur det se lekker sjteis te doesje en det de ganse tied de bel geit. Wils se den waal of neet wete waem d’r veur dien deur sjteit. Lach mer èns lekker mit al dae pech van meneer Dinges.

Veldeke Remunj vónj ‘t sjoon óm ouch ’t oorsjprónkelik Ingelse verhaol in dit beukske op te numme en d’r ’n tweetalige oetgaaf van te make. Wo guf ’t zoget! ’t Beukske is  bedoeld óm veur te laeze aan kienjer van róndj de 6 – 7 jaor, zelf te laeze veur kienjer van 8 -9 jaor. Ajer kienjer van 10 toet 100 jaor laeze natuurlik de Ingelse versie zelf en vergelieke die mit de Remunjse.

Femilie, vrunj, kollega’s van Cathy höbbe ’t beukske al kinne koupe tiedes zien pensioenfeeske. Alle anger geïnteresseerde kinne vanaaf 6 mei terech bie ós bekènde verkoupadresse: Bruna en Boom oppe Neersjtraot, De Póppedokter op ’t Munsterplein, De Kleine Tovenaar in Neel en Van Heijster in Zjwame. ‘t Beukske kos €13,50. De veurraod is beperk!

Oppe foto: (vlnr.) Cathy OKelly (auteur), Riky Simons-Julicher, Hans Simons, Marly Wiermans en Jos Even names Veldeke Krink Remunj.

 

« Trök