't Groot Remunjs Diktee verrassend good gemaak!

Geplaatst op 30 juni 2025

Op 'ne sjnikheite zunjig 29 juni 2025 waogde zich 10 deilnaemers aan 't Groot Remunjs Diktee georganiseerd door Veldeke Krink Remunj in de Bieb aan de Neersjtraot.

De batse ginge bie-ein, 't tungske sjtook oet de móndj en de zjweitdröppelkes parelde langzaam nao ónger. Toch sjloge de deilnaemers zich allemaol good door de teen zinne die Riky Simons-Julicher haaj opgesjteld en door Marly Wiermans - de Póppedokter van Remunj - waerde veurgelaeze.

De zinne vormde same 't verhaol van de tentoonsjtelling 'Remunjs zo gek nog neet', die nog toet 14 juli in 't Historiehoes in de Bieb te zeen is. De twee jóngste deilnaemers ware ouch metein de bèste: ozze Pluum-draeger Luuk Hendrikx (22 jaor), op de voot gevolg door Dirk van Oosten (26 jaor). Van de 300 wäörd haje ze d'r mer 5, respectievelijk 6 fout. Oftewaal, bienao alles good. Zelfs 'n paar serieuze insjtinkers wiste ze es echte sjpecialiste te herkinne.

Mer ouch de euverige deilnaemers, wo van de meiste nog nooits kurzes höbbe gehad, deje 't verrèkde good. OR6 maakde opnames veur de TV. Die zeen vanaaf donderdig 3 juli te zeen op Ziggo-kanaal 41 en KPN-kanaal 1507. 

Ozze taalgrootmeister Pierre Bakkes zei 't netuurlik al: 't hantere van de juuste sjpelling is heel belangriek, mer nog belangrieker is det ederein mekaar begriep. Veur waem det neet genóg is: in 't naojaor sjtart Veldeke Krink Remunj 'ne verkorte kurzes Remunjs Laeze en Sjireve. Geer kint uch insjrieve via info@veldekeremunj.nl.

« Trök