'n Prachtige sjone rit in de Gelöksexpress!
Op zóndig 8 juni vertrók de gelöksexpres ´De Adder’ veur ’t tweede jaor in successie vanaaf de parkeerplaats aan de Kapel in ’t Zandj nao de pareltjes van Roerdalen.
Op verzeuk van de gaste van veurig jaor haet Veldeke Remunj same mit Geluksexpres Roerdalen dit uitje ouch dit jaor veur de leje georganiseerd. En net as veurig jaor waas ’t weer ein geweldige belaevenis!
De route ging langs prachtige natuurgebiede en culturele bezienswaardighede, wo-ónger inkele van de 26 gelöksplekke van Roerdale. Deze zeen door inwoners van Roerdale aangeweze en bie elke plek sjteit ein gelöksbord mit ein ómsjrieving van die plek van gelök.
Zo zeen v’r gereje langs de gelöksplek “De Koelen van de Eeuwige Kracht”, dit zeen waterplassen, de turfkoelen, die rös en laeve oetsjtraole.
Ein angere bezónjere gelöksplek waas “De Windroos van het Kasteel”, kasteel Daelenbroeck det in verval waas geraak en nao restauratie d’r noe weer in volle glorie bie lik.
Tensjlotte kwame v’r veurbie “De Propeller van Herkenbosch”, wo twee gelöksplekke taegeneuver mekaar ligke. Aan de eine kantj de propeller, waat mood, vrieheid, respec en dankbaarheid symboliseert en aan de angere kantj ein pöt en kepelke waat door bewoners van de buurt is gesjtich.
Veur ein lekkere tas koffie of thee mit ein heerlik sjtök vlaai höbbe v’r pauze gehaje in de Prins Bernhardmeule op de Meuleberg aan de Waterschei in Melick.
Heel väöl dank aan de vriewilligers van de organisatie van de Geluksexpress Roerdale, oze chauffeur en gids, die ós ein prachtige middig bezorg höbbe.
« Trök
