Kemissie Educatie

De kemissie Educatie woort in oktober 2001 door ’t houfbesteur van Veldeke Limburg in ’t laeve gerope met as ierste opdrach um veur oos vereiniging ’n educatief plan op te stelle en d’r veur te zörge det ’t al bestaonde cursusmateriaal previnciewied ingezatte ging waere. In ‘t biezónder ónderrich aan de jóngere (schoeëljeug en eur elders) zoel vorm motte kriege. D’r kwaam ’n plan van aanpak.

As ierste woorte de bestaonde cursusse Limburgs Laeze en Schrieve veur ’n aantal dialekte aangepas en bewerk, krege ’ne formele status en d’r woort ’n officieel diploma aan verbónde. Óndertösse zien d’r heejvan al hiel waat gegaeve. D’r kwaam ’n Limburgse declamatiefinale veur basisschoeëllierlinge en d’r woort ’n Limburgstalig póppetheaterstök veur ós gemak door mw Gerda Tekstra. Ouk regelde weej det Veldeke Limburg mei ging doon aan de Limburgse Bibliotheekwaek. In de kemissie laefde allerhand ideeë en d’r woorte inkele dinger met succes oetgeprobeerd, wie ‘n “Liêgerhoesdebat” op ’n middelbare schoeël en dialeklesse op ’n basisschoeël. Ouk de Kirchraose “Kinjerkalkloeb ”vónde weej ’n interessant projek um wiejer te propagere. De kemissie zelf had en haet aevel neet de kapaciteit um zó’n  projekte previnciewied oet te drage; ouk de Veldeke-kringe doon heijaon naor hun meugelikheden meij.