Kaersjverseringe

In de tied van Kaersjmès make veer ’t oes gezèllig in hoes mèt allerlei verseringe, kaertse en lempkes. Veurbeelde van natuurlike decoraties zint de kaersjboum, kaersjsjtökskes', 'ne kaersjkrans en ’ne haamsjeut. ’t Haet allenei te make mèt de hoop op (nuuj) leve.

De ummer greun blievende sjpar, symbool van 't leve, ies oze vertroewde kaersjboum, dae v’r vol hange mèt balle, lempkes en ander fantasieveurwerpe.  Aan de tek hingk me ouch cadeau’s es teike, dat v’r al van Christus höbbe gekrege.
In kaersjleedsjes weurt waal gezónge euver ‘ne denneboum (in 't Duutsj Tannenbaum), meh dat ies ’n ander, verwant soort naoldgewas 

’ne Haamsjeut (ander name zint: Hamsj, Mistletoe, Maretak en Vogelliem) bove de deur brink gelök, zoa zaet de euverlevering. ’t Waor ’n heilige plant bie de Druïde, die de plant mèt ’n gouwe zessel aafsjneje. Ziech puène ónder zoane, ouch greunblievende, tak zou gelök bringe. Veural veur jóng maedsjes in verband mèt hun vröchbaarheid.

De huls ies ’ne greunblievende sjtroek of kleine boum mèt dónkergreun glimmende puntige blaar, woa tösje de felroaj besse hièl kleurig aafsteke. Daorum were de blaar väöl toegepas in kaersjsjtökskes. Gans vreuger woort geluif dat dees plant de koa geis aafweerde. In ’t naojaor zint de besse riep en es de veugel ze neet opete, blieve ze de ganse winter hange. Van ’t hout woorte vreuger sjaaksjtein gemaak.

^{Els Diederen
Valkebergs '06}