Veldeke Pluum 2018 veur Frits Criens
De Veldeke Pluum van de Krink Remunj 2018 geit dit jaor nao Frits Criens. Frits is ’ne sjriever en dichter. Van professie is hae docent Nederlands. Hae kump oet Haele en sjrief ouch in ’t Haeles dialect, maar ouch in ’t Nederlands.
Hae sjrief toneelsjtökker, romans, gedichte en hae verzörgde jaorelangk ’n populaire dialectcolumn in de Tante Bet, het Dagblad de Limburger.
In 2016 aevel verdween ziene dialectcolumn oet de gezet. De formule zól neet meer wirke. Óndanks proteste van sjrievers, fans en ouch van Veldeke waerde de column neer meer in de gezet gezat. De gezet, die zich prizzenteert as ‘de Limburger’, ging zich op ’n anger meneer profilere.
Frits zelf läöt zich aevel neet oet ’t veldj sjlaon. Hae sjrief weer waekeliks, edere dinsdaag, eine nuje verse column op zien eige website: www.fritscriens.com. Ederein dae wilt kint dao waekeliks ziene column Modertaal laeze. Zien vaste laezers haop hae hiemit ’n plezeer te doon.
Frits krieg dees Pluum veur al zien werk as sjtökskessjriever en in ’t bezónjer veur ziene column Modertaal, de taal van ’t geveul. De taal die babies al herkinne as ze nog veilig in de moderboek zitte. In dae column besjrief Frits geweune dinger oet ’t dageliks laeve. Zien vrouw Ellie sjpeelt in dees columns ’n saort alter ego en hilt Frits daomit op ’t rechte sjpaor. Eigelik verdeent Ellie ouch ein Pluum hieveur.
Veer vinje det ’t tied waert óm Frits in ’t zunke te zitte en höbbe besjlaote op ’t Halfvastesjpektakel van Veldeke in Aad Remunj aan de Remunjse Kepel in ’t Zandj aan Frits Criens de Veldeke Pluum 2018 te gaeve.
« Trök.jpg)