> Nuuts

Veldeke Pluum 2012 veur Harie van Buggenums †

Geplaatst op 7 april 2019

De Veldeke-Krink Remunj haet ‘t dit jaor gemekkelik gehad mit de keus veur de Pluum 2012. Op dinsdaag 7 fibberwari is de Pluum 2012 in Kefee-zaal de Sjter in Neel oetgereik. Op deze aovond, mit muzikaal óngerstjeuning van de dialekgroep ‘Sjoerpepier’ droog Harie van Buggenum 'n paar van zien gezèkdes veur.

Harie is emes dae mit zie book  "Zal ich dich ins get zègke" veur de Midde-Limburgse taal van grote waerd is.

Zie book is in de bookhanjel veur € 22,50 te koup. Op zaoterdaag 26 november 2011 waerde dit book in Zjwame geprizzenteerd. In dit book stjaon zó'n 1728 gezèkdes in 't Zjwaams dialek. Netuurlik kómme dees gezèkdes neet allein oet Zjwame. Ze waere aeve good gebroek in Remunj, Neel, Venlo en oppe Ruiver. Mit zie book wilt Harie ’t sjoon Limburgs dialek, 't plat, ónger de aandach bringe. 't Duit hem namelik duchtig pien te mótte zeen det zie dialek neet meer euveral gesjpraoke waert. Ingelse en Nederlandse wäörd vervange wie langer wie dökker oos sjoon Limburgse wäörd. Det vinjt Harie doodzuunj, want hae is greuts op zie plat. In 'n paar jaor tied haet hae al die gezèkdes bie-ein gebrach. Hae haop op dees meneer d’r veur te zorge det ouch de jeug dao later nog dankbaar gebroek van kint make. Zie book " Zal ich dich ins get zègke" is oetgegaeve door de Zjwamer Milieu- en Heemkundevereiniging.

Harie stjeit mit zien 80 jaor neet gaer in de belangsjtèlling. Hae haop aevel det zie book e groot sukses waerd en det väöl miense, veural de jeug oet Midde-Limburg, hie-mit häör veurdeil kinne doon. En hae haop ouch det wäörd van vreuger weer ins get meer gebroek gaon waere.

 

« Trök
Veldeke Pluum 2012 veur Harie van Buggenums â€