Noor en 't Coronavirus, e veurlaesbeukske door Monique Kerpen

Geplaatst op 2 oktober 2020

Wie sjpriks se mit jóng kienjer eigelik euver corona? ’t Veurlaesbook “’t verhaol van Noor en ’t coronavirus” is gesjreve óm kienjer, elders en miense oet ’t óngerwies en de kienjeropvang hiemit te helpe. ‘t Vertèlt op ‘n begriepelike meneer waat e virus is en waat d’rtaege te doon is in Nederlandj, en mit welke richliene. ‘t Gif ouch oetdrökking aan de geveules van ónzekerheid van kienjer en ’t leut zeen det d’r nog sjteeds väöl leuke dinger zeen. Ouch wurt oetlik gegaeve euver de Intensive Care, ‘t woróm van henj wasse en ‘t gebroek van móndjmaskes.

Ónzeker tieje

‘t Coronavirus zorg veur ónzeker tieje; oos gans dagelijks laeve is in kórte tied ingriepend verangerd en veer wete nog neet wie lang dit allemaol zal gaon doere. Same perbere veer vorm te gaeve aan de “óngerhalve maeter-samelaeving”. Ouch veur kienjer is ‘t sóms sjpannend en ónzeker.

Dialek en emotie

 “’t Verhaol van Noor en ’t coronavirus” is gesjreve in ‘t Remunjs dialek. Taal is emotie en ’t dialek zorg in deze ónzekere tied juus veur ‘t zich gebórge veule en veur gerössjtèlling. ’t Kint kienjer helpe óm ‘grip te kriege’ op ‘n ónzeker situatie.

’t Is ouch henjig veur elders en opa’s en oma’s óm  zón ingewikkeld óngerwerp as corona, mit simpel wäörd aan häör (klein)kiendj te kinne oetligke in ’t dialek. ’t Beukske is ouch e sjoon aandinke aan ‘ne oetzunjerlike tied, dae grote invlood haet op ’t laeve van ederein.

“’t Verhaol van Noor en ’t coronavirus” is te koup bie:

• Boekhuis de kleine Tovenaar - Hoekstraat 3, Neel
• Boekhandel-antiquariaat Boom – Neerstraat 31A, Remunj
• De Poppendokter – Munsterplein 22, Remunj
• Plantage boekhandel – Neerstraat 52 A, Remunj
• Primera Roermond – Beekweg 12, Neel
• VVV Roermond – Markt 17, Remunj
• Boekado Van Heijster - Hoogstraat 11, Zjwame
• Restaurant De Pelikaan- via ingank Ziekehoes Remunj
• Hannen, De Bekker - Groene Kruisstraat 10 - Herte
• 't Kepels Winkelke - Kapellerlaan 223, Remunj

Euver de auteur

Monique Kerpen is ‘’n ech Remunjs maedje’; gebaore en getaoge in de Remunjse (binne)sjtad. Vanaaf häöre sjtudietied woonde zie örges angers in Limburg en Nederlandj, óm pas geleje trök te kómme nao Remunj-Neel

Monique haet drie sjtuderende kienjer en wèrk as beleidsmitwèrkster communicatie bie ‘n kienjeropvangorganisatie. Vanaaaf ‘t begin van de coronacrisis besjtaejt zie väöl aandach aan de communicatie mit de elders en mitwèrkers in de organisatie. Maar zie misde e dudelik verhaol óm veural jóng kienjer mit te bereike. Det brach häör zowied det zie zelf e beukske ging sjrieve en dit ouch ging vertale in häör eige dialek, ‘t Remunjs. Zie haop hie väöl kienjer, elders, grootelders en miense oet ’t óngerwies en de kienjeropvang e plezeer mit te doon. En zo wilt zie ouch ‘n besjeije biedraag levere aan ‘t dialec as laevende taal.

 -Mieke Linssen maakde de aansjpraekende teikeninge bie ‘t verhaol en Veldeke Remunj zorgde voor de sjpellingskóntraole.

« Trök