> Nuuts

Jaorversjlaag 2020

Geplaatst op 5 april 2021

Door corona is de jaorvegadering 2020 neet doorgegange

Jaorversjlaag Veldekekrink Remunj 2020

De eerste- en nao later bliek lètste- aktiviteit wo oos leje biej aanwezig zin is de Algemein LejeVergadering op 4 fibberwarie 2020 in Aad Remunj. Jos Even, Marly Wiermans en Anneke Huiskens (aafwezig) waere herbenump, Riky Simons-Julicher en Roger Lucassen kómme ’t besjtuur versjterke. Finansjeel gezeen woor 2019 ’n gezóndj jaor, mit name door de verkoup van de kelender. Raeje óm de eventueel biejdraag veur leje zo leeg meugelik te haje. Nao de pauze treujt ’t dameszang-gruupke MAM oet de Boekoel veur ós op mit sjoon persiflages op bekènde liedjes.

In jan. en fib. verzorg Etty Willemse-Kemp op ’n sjpeelse meneer es nao-sjoolse aktiviteit 6 Limburgse Cultuur- en Taallesse veur ‘Nuuj Limburgers’ van de Vincent van Goghsjool. De kinjer make filmkes die geprizzenteerd waere op 10 maart mit pers d’rbiej. ’t Versjlaag en opzat van ’t projek “Kiek Limburg – Limburgse Lesse veur basissjoolkienjer” is geplaats in ’t Jaorbook van Veldeke Limburg.

21 Fibberwarie is de Daag vanne Modertaal. Veldeke Limburg haet georganiseerd det ’n heel deil Limburgse sjrievers de ganse daag door op radio L1 karnavaleske tekste veurleus.

’n Heel deil geplande aktiviteite kèn vanwaege ’t Coronavirus en de maotregele dao-ómhaer neet doorgaon. Dit jaor gèn Halfvastesjpektakel, gènne declamasiewedsjtried, gèn veurjaorswanjeling, gèn kluch in Grathem, gèn Veldeke jaorbookprizzentasie, gènne kringekontakdaag aan de Kepel, gènne derde kwisnach en gèn aktiviteit róndj Kersmis of Sinterklaos.

Waat natuurlik waal doorgeit is de Remunjse sjeurkelender veur 2021. ’t Eerste eksemplaar waert op 4 juli oetgereik aan Petra Wasserman van de Sjteine Brögk ómdet ziej de gezègkdes behanjelt in häör lesse. De totale oplaag van 850 eksemplare is alweer veur Kersmis oetverkoch. Jaomer det d’r 7 misdrökke tösse zote.

Good nuujs en sjlech nuujs:

Op 24 april waere oos leje Albert Schouten en Mathieu Beeren gewaardeerd mit ’n keuninklik lintje veur al häör verdeenste op maatsjappelik terrein. En op 22 december krieg Hans Simons de Veldeke Pluum 2020 thoes oetgereik door veurzitter Henk Giesbers veur al zien handj- en sjpandeenste veur de vereiniging Veldeke.

Veer sjterfgevalle in ózze krink dit jaor. Op 4 april sikkertaris Anneke Huiskens, det 12 jaor lang óndanks toenummende lichamelike klachte mit väöl plichsbesef oos sikkertariaat haet geveurd. Op 26 augustus óntvèlt oos lid Miep Janssens- Nelissen, op 22 september sjturf Mia Parren-van Elmpt en op 27 december Frits Roumen. Frits woor de lètste jaore juryveurzitter van de Remunjse declamatiewedsjtried.

Besjtuursaktiviteiete:

’t Besjtuur haet óndanks de beperkinge neet sjtilgezaete. 

’t Sikkertariaatsadres is euvergenaome door Riky; de inhoudelike take daovan zin euver meer persone verdeild. Roger blief aspirant-besjtuurslid.

D’r is drie keer digitaal vergaderd via Teams of Whatsapp op 28 april, 26 mei en 25 augustus. Op 13 oktober kènne v’r nag èns live in De Sjter terech en op 22 december is ’n ‘hybride’ vergadering mit drie liefelik aanwezige en drie online mitdinkers. Mit det digitaal gebeure zin v’r neet erg gelökkig.

Vanne zomer is de lejelies opgesjoond. Veldeke Remunj haet noe 216 leje. Ouch krege v’r ’n nuuj lid d’rbiej oet Berlien. Op 8 nao moge veur ederein per e-mail benadere.  

Nuutsbreve kriege oos leje in maart, mei, juli, augustus, oktober en december. Die zin van ’ne nuje opmaak veurzeen. Ouch de facebookpagina is aangepas. Kiek noe op: www.facebook.com/VeldekeRemunj Marly en Riky behere die.

Dao is ouch ’t interview truuk te vinje det Guus Rüsing op 5 september heel mit Henk Giesbers en Hetty Jacobs-Wiermans euver de sjeurkelender.

Henk en Jos haje de website biej en doon de nuutsbreve.

Ouch hele veur aafgeloupe jaor ’n enquête ónger oos leje. Get meer es de hèlf haet die ingevöld en truukgesjtuurd. Dao-oet bliek det de meiste invöllers tevreje zin mit de aktiviteite van Veldeke Remunj waat betruf saorte en de frequentie. Veural ’t halfvastesjpektakel, de sjeurkelender en de lesse in laeze en sjrieve sjpringe d’roet. Allein euver de tiedsjtippe van de aktiviteite is me nagal verdeild.

In augustus versjient ‘ne corona-poster mit vertaling in ’t Remunjs.

De beuk:

In deze coronatied wo-in veur nieks kènne organisere wo de leje biej aanwezig zin, zin mer leefs drie beukskes in ’t Remunjs versjene wo-aan Veldeke Remunj mitgewèrk haet:

- Monique Kerpen oet Remunj sjreef ‘’t Verhaol van Noor en het coronavirus’, wo-in in jip-en-janneketaal ’t wie en waat van det virus waert oetgelag aan jóng kinjer.

- Lisa Naus oet Boekoel haet de gedichtebundel ‘100 Daag Drök’oetgegaeve. Dao-in zin 100 gedichte biejeingezat die het sjreef tiedes de eerste lockdownperiode en die bedoeld wore óm de laezers te laote glimlache.

- De Kemissie Volkscultuur van Veldeke Limburg sjtèlde ’n beukske same mit verhäölkes veur kinjer in waal 16 dialekte. Hetty Jacobs-Wiermans vertaalde ze in ’t Remunjs. De eerste oplaag van ‘Verhäölkes in ’t Remunjs’ woor in minder es drie oer ram oetverkoch. Veur Kersmis versjeen de herdrök al.

Veur oos leje wilt ‘t besjtuur get extra’s doon in dit coronajaor en v’r beje de leje ‘n exemplaar aan aan eine gereduceerde pries. 

Op ’t lèts van ’t jaor waert nag bekènd det de provincie en ’t ministerie van Binnelandse Zake same 4x € 12.500 wille besjtaeje aan educatief, kreatief, leerzaam materiaal veur kinjerdaagverblieve of ’t basisóngerwies. Ouch daomit wilt ’t besjtuur aan de sjlaag. Veur 1 fibberwarie 2021 mót den ’n projekplan waere ingedeend.

Wiejer wilt de gouverneur ’n Limburgse bewaeging op gang bringe en haet via de veurzitter van Veldeke Limburg ‘ne oproop gedaon óm mit te dinke. Jos -dae in november de digitaal lejevergadering van Veldeke haet biejgewoond- haet daonao ‘n prima idee róndj bekènde Limburgers aangereik en get oetgewèrk mit es titel ‘Veer versjtaon ós’. Ouch daovan zólle v’r volgend jaor meer heure.

Zjwame, 17 fibberwarie 2021, Riky Simons-Julicher.

« Trök