Fons Even gesjtórve
Op dinsdig 6 september jl. krege veer 't dreuvig berich det oze ere-veurzitter Fons Even is gesjtórve.
In Memoriam Fons Even
Op 6 september 2022 krege veer ’t dreuvig berich det Fons Even waas gesjtórve. Veer wiste det Fons de leste jaore flink aan ’t sukkele waas mit zien gezóndjheid en veer wiste det hae al versjillende kere door ’t oug van de naolj waas gekraope. Fons waas aevel ’ne sjterke miens dae edere keer weer opkrabbelde.Toch kump dan nog gans ónverwachs dae man mit de zeis. Veer mótte oze ereveurzitter aafsjtaon.
Van hoes oet waas Fons ’ne veldjbioloog. Zien passie det waas de netuur. Hae haaj respek veur al waat laef. Zelfs de grótste viejande van zien bieje, de wespe, wovan hae regelmaotig neste mós rume, maakde hae neet gaer kepot. ‘Ouch die höbbe ’n functie’, zag hae dan. Fons ziene honing waas in Neel waereldberoemp. Hae had ziene eige bóngerd mit fruitbuim wo de bieje duchtig op vloge. Hae waas imker in ziene eige micro-kosmos. Fons zoog de samelaeving as ein organisch geheel, wo se as miens ouch e óngerdeil van bös, get waat se good mós blieve óngerhaje.
Hae ging in de polletiek, waerde wethajer Sjtadsóntwikkeling in Remunj en zoot zich daonaeve in veur de Limburgse taal- en volkscultuur. As ein van de mede-oprichters en besjtuursleje van de Veldeke-Krink Remunj is Fons meer dan 25 jaor actief gewaes. Same mit illustere veurgengers wie Jo Hansen zaliger, Paul van der Goor zaliger en Pierre Bakkes haet hae zich ingezat veur de dialect- en volkscultuur van Remunj en ómsjtreke. En det veur ’ne geïmporteerde Hollenjer oet Didam. Van hoes oet sjprook hae gaaroet gein plat, maar hae waas zo good geïntegreerd in de gemeinsjap det op d’n doer bienao nemes meer 't versjil merkde. Fons waas d’r zich van bewus det taal en cultuur de liem is waat oos samelaeving biejein hilt. In de jaore van 1997 toet 2003 leidde hae de Krink Remunj zelf. Ónger zien veurzittersjap maakde de Veldeke-Krink Remunj ’n bezónjere greuj en bleujperiode door. Hae waas erelid van Veldeke Limburg. Hae sjtóng veur de Limburgse taal- en volkscultuur mit e groot plichsbesef. Nemes kwaam ’m daoaan. Veer zeen ’m dankbaar veur al waat hae veur ós haet beteikend en veer winse zien vrouw, kienjer en kleinkienjer heel väöl krach óm dit verluus e plaetske te gaeve.
Zien lief haet 't gevech verlaore, ziene geis blief besjtaon.
Henk Giesbers (veurzitter Krink Remunj).
« Trök