Actueel

Actueel > Aktiviteite

Aktiviteite 2019

Aktiviteit op 31 december 2020

Aktiviteite 2019

Op zóndaag 27 januari in de ECI in Remunj, de tweede editie van ’t Festival Sjiek. Eine ganse daag Limburgse kultuur op dit festival van ’t gesjreve, gesjpraoke en gezónge waord. Op ’t program sjting as aafsjloeting van de daag ’n oetveuring van de legendarische Opera El Rey. Cine Sud zörgde veur ’n inkele films van Limburgse gróndj, Renate Reijnders brach zien cabaret en de hardrockband ‘Vandale’ oet Zittard sjpeelde in de popzaal. De Sjiek Littératuurpries 2019 waerde oetgereik aan Wim Heijmans oet Kirchrao en ouch ware d’r versjillende workshops veur kienjer.

Op vriedaag 8 februari 'n diploma-oetreiking.
11 deilnaemers aan de laes- en Sjrief-cursus veur beginners krege häör oorkonde oetgereik. Pierre Bakkes waas de cursusleider.

Op goonsdaag 20 februari waas de Algemein Lejevergadering in Aad Remunj mit e geweldig muzikaal optraeje van oos lid Har Reijnders en ’ne gans geveulige monoloog ‘Gelökkig kómme de daag ein veur ein’ van Gerda Schattorjé.

Op dónderdaag 21 fibberwari is de internationale Daag van Modertaal.
Op goonsdaagaovend de 20e höbbe veer oppe jaorvergadering door 'ne monoloog van Gerda Schattorjé en Limburgse leedjes van Har Reijnders hie al aandach aan gegaeve. Ouch op oze website waas aandach veur deze daag.                          

Op zaoterdaag 30 maart 2019 waas in Aad Remunj oos Halfvastesjpektakel. De rezjie waas in henj van Jos Even en de prizzentasie gebeurde door Marc Breugelmans. ’Ne köstelike aovend óm van te genete. Ouch kreeg op deze aovend oos lid Etty Willemse-Kemp de Pluum 2019 oetgereik. Etty is 'ne echte Remunjse kultuurdrager. Etty duit al jaore zien bès veur Veldeke’s Declamatiewedsjtried en wit de kienjer toet grote heugte te bringe in 't veurdrage van gedichskes. Daonaeve organiseert Etty al jaore de dialekmis ane Kepel in 't Zandj. Netuurlik kint ederein Etty óm häör geweldige zangsjtum, womit de prach van oos Modertaal bie ederein waal mót binne-kómme. 


Op vriedaag 12, zaoterdaag 13 en zóndaag 14 april sjpeelde ‘kiek Mer’ oet Gratem ‘'t is Bingo oppe camping’. Vanoet oos besjtuur is nemes dao nao toe kinne gaon. Veer kinne uch dus jaomer genóg neet vertèlle of d’r väöl Veldeke-leje ware en en wie ’t gewaes is.

Op Goonsdaagmiddag 15 mei de Midden-Limburgse declamatiewedsjtried veur kienjer van basissjole in de Bieb in Remunj. 3 Kienjer mochte nao de Limburgse finale op zaoterdaag 25 mei 2019 in Dok6 in Kepel (Panningen).Veur oze Krink haet Julia Silkens oet groep 5 van bs. de Sjtapstein oet Herte de 3e pries gewónne.

Op zóndaagmiddaag 16 juni hadde veer oos veurjaorswanjeling. Dit jaor ónger leijing van Frans Janssen. Veerteen deilnaemers krege 'n sjprankelende wanjeling veurgesjótteld en wanjelde vanaaf de Eci nao de werf (de Roerkade). Óngerwaeges waerde väöl geleerd euver de hiestorie van Remunj en kwame veer op plekskes die veer nog noojt gezeen hadde. Op 't daakterras van hotel Dux waerde genaote van e heerlik teske kóffie mit e sjtökske flaaj. As ’t geit lökke gaon veer dit jaor ’t daakterras van det nuje hotel ‘de Valies’ ins perbere.

Op goonsdaag 26 juni prizzenteerde Veldeke Limburg in de ECI Cultuurfebriek in Remunj 't Jaorbook 2018. Wie gebroekelik waert in dit jaorbook e euverzich gegaeve waat zich aafgeloupe jaor haet veurgedaon op 't terrein van óngerzeuk en publikaties euver de Limburgse taal en volkskultuur. Eder lid kreeg dit jaorbook toesgesjtuurd

Op zaoterdaag 6 juli is door veurzitter, Henk Giesbers, de derde sjeurkelender mit sjpreuke en gezèkdes oet Groot Remunj (Herte-Neel-Remunj-Zjwame) aangebaoje aan Pepijn Afman, de Remunjse kultuurbörgemeister. In deze kelender vinjt geer, naeve get ideje veur veurname veur e nuuj kiendje, ouch edere maondj weer get sjeldjwäörd, altied gemekkelik. De teikening op de ómsjlaag van de kelender waas weer gemaak door oos lid, de Remunjse kunsteneer Gerard Nizet. Veer kinne uch melje det de kelender vlak veur de Sinterklaos ram waas oetverkóch.

Op zaoterdaag 31 augustus haet ’t besjtuur deilgenaome aan de Kringe Ketakdaag dit jaor in Valkeberg. Kómmend jaor geit de Krink Remunj deze daag organisere. Veer gaon det doon in ’t Kepels Keteer.

Mit väöl plezeer höbbe veer op goonsdaag 9 oktober oos lid Karel Ruiten kinne fillesetere. Hae waas de winnaar van de Veldeke Taalkwis 2019. Veer ware d’r greuts op det emes oet Remunj en dan ouch nog eine van oos leje te weite Karel Ruiten gewónne haet.

Op zóndaagmiddaag 22 september dreijde in de bioscoop van de ECI veur ós de dialectfilm ‘het Galgenven’. Nao aafloup waas d'r e drenkske en kós nog effe naogeklets waere mit de Remunjse acteurs.

Op zaoterdaag 2 november is veur de tweede keer de Grote Veldeke KwisNach in Aad Remunj. Chantal Mulders haaj op ’n geweldige meneer de vraoge ineingesjtaoke. ’t Waas eine gans sjone aovend. De belangsjtelling van oos leje waas aevel sjamel. Veer sjnappe eigelik neet det veur zón sjprankelende moderne aktiviteit zo min belangsjtelling is.

Op vriedaag 22 november gedinke veer in de Ster in Neel 75 Jaor Vrieheid. D’r waerde e geweldige veurdrach gehaje door John Vaessen euver de WO II sjlachoffers op ‘den Ajen Kirkhaof’. D’r waas meziek oet de oorlogstied van ’t saxofoon ensemble Saxofiel oet Neel en d’r waas ’n indrökwekkende expositie van de Provincie Limburg euver de bevriejing van Limburg 75 jaor geleje. Alle bezeukers krege e aandinke, e sjotje mit oraanjebitter, e ech kollektors-item!

Op vriedaag 29 november ’n diploma-oetreiking in Grathem. Neet minder dan 31 deilnaemers aan de Laes- en Sjriefcursus krege ’n oorkonde oetgereik op ’ne drök bezatte aovend tiedes ’t Groot Grathems Dictee in de Nassaurie. Oos lid Giel Aben läöt hiemit zien sjpaore in de Limburgse taalwaereld duchtig achter. De cursus zelf  waerde netuurlik weer gegaeve door nemes minder dan Pierre Bakkes.

En dan as allerlèste in 2019. Op maondaag 23 december sjteit in de Tante Bet det half jannewari door Etty Willemse-Kemp gesjtart waert mit Limburgse les veur de jeug op bs. Vincent van Gogh. Dit waere neet ech taallesse, maar lesse óm kienjer kinnis te laote make mit oze Limburgse kultuur. Dit is e geweldig initiatief gans passend bie de doelstjtelling van Veldeke.

« Meer aktiviteite