Veldeke Pluum 2012
De Veldeke-Krink Remunj haet ‘t dit jaor mekkelik gehad mit de keus veur de Pluum 2012. Op dinsdaag 7 fibberwari is de Pluum 2012 dan ouch in kefee-zaal de Sjter in Neel oetgereik. Op deze aovond, mit muzikale óngerstjeuning van de dialectgroep ‘Sjoerpepier’ droog Harie van Buggenum 'n paar van zien gezègkdes veur.
Harie is emes dae mit zien book Zal ich dich ins get zègke veur de Midde-Limburgse taal van grote waerd is.
Zien book is in de bookhanjel veur € 22,50 te koup. Op zaoterdaag 26 november 2011 waerde dit book in Zjwame geprizzenteerd. In dit book stjaon zón 1728 gezègkdes in 't Zjwaams dialect. Netuurlik kómme dees gezègkdes neet allein oet Zjwame. Dees gezegkdes waerde aeve good oetgesjpraoke in Remunj, in Neel, in Vinlo en oppe Ruiver. Mit zien book wilt Harie ’t sjone Limburgse dialect, 't plat, ónger de aandach bringe. 't Duit hem namelik duchtig pien te motte zeen det zien dialect neet meer euveral gesjpraoke waerd. Ingelse en Huilandse wäörd vervange wie langer wie dökker ós sjone Limburgse wäörd. Det vint Harie doodzuunj, want hae is greuts op zien plat. In ein paar jaor tied haet hae al die gezègkdes biejein gebrach. Hae haop op dees meneer d’r veur te zörge det ouch de jeug dao later nog dankbaar gebroek van kint make. Zien book Zal ich dich ins get zègke is oetgegaeve ónger auspiciën van de Zjwamer Milieu- en Heemkundevereniging.
Harie stjeit mit zien 80 jaor neet gaer in de belangsjtelling. Hae haop aevel det zien book 'n groot sukses waerd en det väöl miense, veural de jeug oet Midde-Limburg zich op dees meneer kinne sjpegele aan häör aafkóms. En hae haop ouch det wäörd van vreuger weer ins get meer gebroek gaon waere.
‘Det is eine oetgekaokde. Eine oetgekaokde is neet gekaok mer gesjlepe, sónger det ze dem oppe sjliepstein gehaje höbbe. Dae is d’r sjerp op óm ei veurdeil te haole. Wen get tegooj oetgekaok is, den zit dao neet väöl meer in. Daoróm is ’t vraemp det eine dae op ein geraffineerde meneer perbeert ’t ungelste oette kan te haole, eine oetgekaokde genump waert. Dae haaj väöl baeter eine oetkaoker kónne heite, want dae haolt droet waat drin zit’.
‘Kiene is ein sjpel mit kaarte en bulkes en det geit dök óm prieze. Van zónne pries waert den gezag det dae oetgekiend waert. Ouch emes dae neet meer mit kan doon is oetgekiend. Geweunlik waert hiemit aevel bedoeld det eine dae oetgekiend is, zich get tegooj oetzeuk. Det mós se dich van teveure tegooj oetkienne, en den geit det ouch’.