Vanaaf november weer: cursus laeze en sjrieve!
Döks weurtj gedach det Veldeke allein väör aojer luuj zoe zeen. Van d’n eine kantj kloptj dit. Es se allein nao ’t bezeuk van oos aovendje kiks, liektj det zoa. Mer waat is awd? Es se 50+ bös? Väör angere is 30 al ‘ne hieële laeftied! En waem veultj zich awd? Det liktj gans versjillendj. En is ’t neet logisch det se op zekere laeftied get mieë tied höbs väör zó’n zakes es heem en wie de luuj laeve en gelaefdj höbbe?
Vanne angere kantj zeen ouch sjus jóngere geïnteresseerdj in oos dialect. En die höbbe ouch ’t meis aan ’t behoud d’r van. Lét mer ‘ns op wieväöl “plat”d’r (weer) weurtj gespraoke. Ze sjame zich dao gelökkig neet mieë väör, wie det ’n aantal jaore geleje waal woor. Natuurlik zeen d’r ouch situaties wo det neet gewènsjt is, bv es d’r luuj bie zeen die det neet kènne verstaon. Den pasj m’n zich aan en mit oos twieëtaligheid (of mieë) kènne w’r die ruumsjoats tegemoet kómme.
Dènk ouch ‘ns aan de leedjes en de bute in ’t dialect. Die gaeve dök de sfeer zoa treffendj weer.
Det is ouch de raeje woróm Veldeke d’r is en wo-äöver die zich drök make. Mit activiteite op versjillendj gebied en väör jónk en awd.
Door de versjillendje Kringe van Veldeke Limburg waere regelmaotig cursusse gegaeve óm ’t Limburgs dialect te lieëre laeze en óm ’t good te sjrieve.
Ouch Veldeke Kring Ech geuf al sinds jaor en daag zónne cursus. Bie genóg deilnummers zal det ouch bönnekort weer ’t geval zeen. De cursus is bedoeldj väör ederein dae ’t dialect baeter wil lieëre kénne. Väöral ’t laeze van de versjillendje dialecte en ’t sjrieve van ’t eige dialect. Det hoof dus neet persé ’t Echs te zeen; m’n lieërt zien eige dialect good te sjrieve. Daobie weurtj oetgegange van de door de vereiniging Veldeke in 2003 vasgestèldje spelling.
Natuurlik zoe ’t hartstikke sjoan zeen es väöl leje oos dialect ouch kóste sjrieve. En höbtj ger gein meutje mit ’t laeze van ’t Veld(j)eke Bekèt? Anges is dae cursus ouch get väör uch. Zès aovendje en bès gezellig. Cursusleider is oos bestuurslid Piet Aben en w’r beginne dit jaor op 18 november in de Patriciussjoal in Pej. Es g’r d’r den bie zeentj, weurtj raekening gehaoje bie ’t vaststèlle van de anger daag.
Kiek ’s óm uch haer, missjien is d’r nog emes dae det zoe wille doon en mit z’n twieëe…
Maaktj d’r get reklaam väör, want ’t is belangriek det w’r oos dialect ouch good kènne laeze en sjrieve. Väör de koste hoof m’n ’t neet te laote: Veldeke-leje kriege korting en betale 20 euro väör zes lesse, angere 30 euro.