Veldeke Pluum 2010 veur Joke Linnartz
De Veldeke Pluum 2009 geit dit jaor nao Joke Linnartz. Joke Linnartz, det woont oppe Dónderberg in Remunj, is emes det veur de Limburgse taal- en volkskultuur en mit name veur Remunj góldj waerd is. In die zogenaamd lestige Remunjse wiek is Joke eine trekker. Joke is ein vroumes, det mit alles waat 't in zich haet perbeert ein sjtök gemeinsjapszin in die wiek op te boewe. ’t Wirk van Joke moog waal ins get meer gewaardeerd waere, zeker as ‘t geit euver de intergatieperblematiek oppe Dónderberg. Op zien eige meneer wirk Joke geweun mit witte en zjwarte kienjer. Aanpakke, neet kletse, geweun doon, det is de fielezofie van Joke. Daobie is Joke ouch nog sjterk in taal en 't sjrief väöl in oos deerbare Limburgse taal. Ouch wit Joke sjoon dinger op ein kunstzinnige meneer mit verf aan ’t dook toe te vertroewe. Joke perbeert al zien ganse laeve klein óngerdeile oet oze volkskultuur neet verlaore te laote gaon. In zien sjilderieje kump de aandach veur sjone en kleine details oet oos ómgaeving nao veure. In zien leedjes sjrief Joke euver de geweune dinger die hem opvalle óm os haer. Sjitterende leedjes haet Joke gesjreve. Zien sjoonste leedje is messjiens waal ”Remunj, sjtedje aan de Maas”. Mit ’t leedje “de ganse zjiep zjaf” sjtóng Joke op de bühne in de finale van het LVK. ’t Is 'n vrouw die geweldig väöl duit veur de Bóntje Aovend Sjtichting (BAS) oppe Dónderberg. Ouch de tekste veur de Kienjer Bóntje Aovende waere veur ein groot deil door Joke bedach. 'Tante Joke' waerd dan ouch door zjwarte en witte kienjer op henj gedrage. Joke is ein vrouw mit ein enorm binjend vermoge, emes die wie ein peskske bloom tösse de miense sjteit en gemeinsjapszin oetdreug. ’t Wirk van Joke moog bes waal ins get meer gewaardeerd waere. De Veldeke-Krink Remunj haet dan ouch in häör wiesheid besjlaote aan Joke Linnartz de Veldeke Pluum 2010 te gaeve en det gebeurde op het Halfvastesjpektakel in eine ram oetverkochte, sjtampvolle zaal van Aad Remunj aan de Remunjse Kepel. De Veldeke-Krink Remunj is Joke bezunjer dankbaar. Joke sjteit op zien meneer paol veur de Limburgse taal- en volkskultuur. Ein gemeinsjap kint neet boete zón miense. Joke is emes wo de Veldeke Krink-Remunj gans greuts op is.
H. G.