Noets van de krink Wieërt

’t Waas alweer ‘nen tiêd gelieëje det ve mét ‘ne groep cursiste stardje mét de basiscursus Laeze en Schriêve. Det kwoom umdet ve inne aafgeloûpe twieë jaor drök wore gewaesj mét de samestélling van ’t spraekwoeërdebook Schoeën gezagdj.

‘ne Stieëvige groep van zoeë ‘n 15 jong luj begos in mei enthousiast en 7 waeke later wore ze allemaol zoeë wiêt det ze ’n eige ‘meîsterwêrk’ in ’t Wieërtlands koste make. E soeërt proofwêrk inne vorm van e verhäölke of gedichtje. Wat opveel waas det ze allemaol mét zoeëvöl plezeer de lésse volgdje di-j meîster Jan Feijen good vuuërberedj haaj.

De meîsterwêrke straoldje det ouch uut, d’r zoot völ humor in vertaaldj.

Op 15 juni hebbe ve ‘ne schoeënen aovendj georganizieërdj, woeë op neet toevallig ‘ne goje spraeker ’n vuuërdracht heel oeëver ’t thema ‘Humor in ’t dageliks laeve’. Alle cursiste loze eur eige meîsterwêrk vuuër en krieëge daonao ’t waalverdeendje diploma.

De reaksies wore dudelik: aan kandidate vör de vervolgcursus gein gebrek!

                                                                                                     Jan Moonen

inkele cursiste mét eur pas behaoldj diploma