Maria-Leechmès

Maria-Leechmès (Maria-Lichtmis)
_{Op 2 fibberwarie, fièrtig daag nao keersjmes, viere v’r ’t fiès van Maria Leechmès. ‘ne Andere naam ies vrouwedaag.}

_{De naam leechmès kump van de leechprocessie, die veur de Heilige Mès plaatsvingk, ter ière van Jezus dae 't leech zal bringe. Dit ies 'n kerstening van ’t aanvankelik fiès van ’t lenge van de daag. In de Mès zölle de keertse gewiejd were.}

 
_{Volges de Juudse wèt moos Maria gereinig were nao de geboorte van häöre zoon Jezus en ’n zuveringsoffer bringe, besjtaonde oet ’n koppel doeve. Dit sjteit te leze in 't evangelie van Lucas.}

_{Zoan zuveringsritueel, kèrkegank geneump, waor in vreuger jaore, bie katholieke vrouwe die bevalle waore, ouch gebrukelik.}

Tempelgank

_{Teves weurt op dezen daag de "opdrach van Jezus in de tempel" herdach.
Maria en Jozef brachte Jezus nao de tempel um häöm op te drage aan God.}

Gebruke

_{Kèrkgengersj naome de gewiejde keertse mèt nao heim um ze te gebruke in tieje van noad, zoa-es bie hómmelswaer. Mèt ’n aangesjtoke keerts woort ’n nuuj hoes ingegange um alle veer de heuk te dröppele veur ’n gooj toekóms in ‘t geboew. Sóms deeg me dröppele keertsevèt mètgeve in ’n doadskies. De gewiejde kèertse zouwe ouch geneeskrachtig zin. Boere lete daorum get dröppele keertsevèt op ’t zaodgood valle en ginge in de sjtal rónd mèt ’n keerts um ’t viè tege krenkdes te besjerme.}

Waersjveursjpelling

_{2 Fibberwarie sjpeelt 'n groate rol in de waersveursjpelling. Es de zón sjeen, waor de boer neet blie. Waor ´t duuster dan houw hae gooj zin. Bleef ´t waer helder dan veursjpelde dat väöl ougs in de kelder. Geuf ’t op 2 fibberwarie klièblaad, dan vèlt mèt Paosje sjniè op ’t paad.}

_{Els Diederen, Valkebergs, 2010}