Jacques Nijsten ieërelid

Bie ‘t 25-jaorig jubileum van de VeldekeKrènk Gelaen en ómsjtreke op vriedig 9 oktoaber 2009 is de mede-oprichter en nog ummer besjtuurslid Jacques Nijsten door veurzitter Lei Pennings van Veldeke Limburg duchtig in ’t zunneke gezat.

Lei vertèlde Jacq wat hae allemaol veur Veldeke Gelaen en veur Veldeke Limburg gedaon haw. Waarsjienlik waor Jacques die dènger al lang vergaete, want ze waore veur häömzelf ummer vanzelfsjpraekend.
E klein deil oet dees toesjpraok:

“In de aafgeloup 25 jaore zin d’r hieël get besjtuurslede gekómme en weer gegange. Kènnelik is dat zoa in alle besjture, sómmige kómme aan, laote es nuuj besseme alle awwe sjtöp opvlege en zin al weer weg es dae sjtöp op de aw plaats trukvilt. D’r zin tieje gewaes dat ’t besjtuur van deze krènk besjtóng oet neuge luuj, en wat zeen v’r noe?

Ze zin weer mit krek zoaväöl es wie ze begooste, mit zien vere. Ouch nog veer die al lang aan dees kar trèkke.

En wat zeen v’r nog mieë?

Eine van die besjtuurslede van ’t ieësjte oer is nog ummer op ziene pos. Dat is Jacq Nijsten. Zjaak Nieste veur degene die ‘m kènne. En ich maog mich gelökkig prieze Jacq in mien paar jaore es veurzitter van Veldeke Limburg te höbbe lieëre kènne.

Vanaaf 1992 tot 2005 zaot Jacq in ’t hoofbesjtuur van Veldeke Limburg. In dae tied waor ’t zoa, dat edere krènk e besjtuurslid nao ’t hoofbesjtuur moos sjikke. Dat waor Jacq veur de krènk Gelaen. Wie dit gebroek aafgesjaf woort, haw Veldeke Limburg ‘ne portefeuillehawwer veur presentatie nuëdig. Jacq zag dao jao op en dus sjtóng hae ummer vaerdig óm de Veldeke-oetgaves mit zien bokekräömke in gans Limburg, in ’t boeteland of bie biejeinkómste van de Sjtichting Nederlandse Dialecten tot zelfs in Zeeland of in Twente te presentere en aan de man of vrouw te brènge.

Hae waor beheerder van alle Veldeke-oetgaves op ’n apaart daoveur ingerichde kamer in zien hoes.

Nao zien aaftraeje sjtóng hae ummer klaor óm zake veur Veldeke te doon. Moos ins ‘ne kièr get gedaon waere, dan waor e telefoontje nao Jacq genóg. Hae brach de jeugdoetgaves van Veldeke Limburg nao alle kringe in de ganse provins, hae zörgde dat ederein genóg beuk in veurraod haw óm die zelf aan de man te brènge

Kortweg, Jacq is en blif ’n ieverig menneke, sóms get gaw aangebrand, meh ouch direk d’rop weer aafgekeuld en noats te beroerd óm de henj oet de moewe te sjtaeke, en dat allemaol ónger ’t motto:

Wat gedaon mót waere, mót gedaon waere, en dan dóón ich dat toch.

Jacq, names ’t hoofbesjtuur van Veldeke Limburg wönsj ich dich perficiat mit dien 25 jaorig besjtuurslidmaotsjap, wovan ouch nog ’n aantal jaore es veurzitter, van de krènk Gelaen en ómsjtreke.

En ich kèn dich vertèlle, dat Veldeke Limburg dien werk veur de vereiniging zoa waerdevol vink, dat ze dich beneump haet tot ieërelid.”

Nao dees toesjpraok kreeg Jacq ’t Gouwe Veldekesjpengske opgesjtaoke en kreeg zien vrouw Marijke e sjiek boekèt blome.

Van de veurzitster van Veldeke Gelaen e.ó. Riet Lenssen, kreeg Jacq later op d’n aovend ‘ne sjoane brónze penning, ouch vergezeld van e boekèt blome veur Marijke.