Es de Sterre straole.... (16 november 2011)
't Programma
Ónger d’n titel: ‘Es de sterre straole…’ organisere Veldeke Krink Ech en de Vereniging van Natuurvrienden oet Zöstere op woonsdig 16 november a.s. eine dialectaovondj mit väördrachte, leedjes en meziek.
De samewirking ligktj väör de handj. Zoawaal Veldeke es de Natuurvrunj hechte aan ’t behawd en ‘t gebroek van oos eige taal es óngerdeil van oos identiteit.
En noe höbbe dees vereniginge zich same gepaktj óm daoväör get goods te kènne prissentere: ‘ne Ech-Zösterse aovendj. En den Ech en Zöstere neet te zeen es plaatse, mer es gemèndje, want ’t streve is óm oet alle kerne van de oetgestrèkdje gemèndje Ech-Zöstere minse aan te trèkke óm mit te doon.
En det is gelöktj! Zank vanne Deelgaard (Anne Lieke), oet Pej (Martin Tonnaer), vanne Boesj (Sef Laughs) oet Roostere (Britt Eberson) en oet Zöstere (Jan van Wegberg en ’t Kwintet Sumadi), meziek oet de Nuujstadt (orkes De Old Timers) en oet Zöstere (combo Jo Huijnen) en dao tösse door väördrachte, door kènjer (wènnieërs van de declamatiewedstrieje) en door volwassene wie Henk Schulpen oet Deetere, Jack Housmans oet Gebrook, Eric van Hooy oet Roostere, Ine Jochems-Simons oet Staeveswaert, gebäörtig oet Sjaelberg en Annie Schreuders-Derks oet Zöstere. ’N vol en gevarieerdj programma dus, det geprissenteerdj zal waere door Jos Douven en Paul Niessen.
Zelfs mit de steun van ’t VSB-Fonds kan zónne aovendj neet väör niks. Leje van de beide vereniginge betale 5 euro en neet leje 8 euro. Det is inclusief ’n consumptie. Es ’t aansluitj wille de vereniginge van “Es de sterre straole…” ’n twieë-jaorliks treffe make.
Mer noe ieës: ‘Es de sterre straole 2011’ op woonsdig 16 november óm 19.30 oer in de Harmoniezaal aan de Feurthstraat 56 te Susteren.
